Uncategorized May 17th, 2008
معرفشى ليه انا بكتب البوست دا ع الرغم من ان بكره امتحان الكومينكيشن
بس وانا بزاكر كنت بزاكر ف كراسه لقيت مكتوب فيها
كلمات رجعتنى بالذاكره لورا
فكرتنى بحاجات كنت بحلم بيها ف الوقت اللى كتبت فيه الكلمات ديه
سبت الكومنينكيش وبصيت للسقف …ياااااااااااه حسيت انى سافرت
بس مبصتش على السقف وسرحانة علشان فى حالة حب لا سمح الله
وبستمد من السقف العون زى افلام زمان
لا بصيت عشان اعد كام مره عرفت ناس وسبتهم
كام مره عرفت حد وحبيته ودلوقتى معرفشى حتى هوه عامل ايه ؟
كام مره كان ليا زمايل واصحاب وسيبنا بعض ..مش عشان هما وحشيين
لا سيبنا بعض وفرقنا الزمان وفرقتنا الدنيا والكليات
حسيت انى انشيديت اوى وفكرت
كام حاجه فهمتها وصدمتنى ؟ وقلت يا رتنى ما كنت فهمتها
كام حاجه عرفتها ..بس كانت معرفتها متأخره اوى
فضلت سرحانه وفكرت ف وقت ضيعته ومحستشى بيه بندم ندم عمرى ع الوقت دا ؟
كام فرصه ضيعتها من ايديا ومش عارفه اعوضها ؟
سرحت اكتر واكتر ورجعت بالذاكره لورا اوى اوى
ايام ابتدائى وما اجملها من ايام …. مريت بشريط سينمائى للابتدائى والاعداى ادم عنيا
واد ايه كان حلمى الصغير انى ابقى دكتوره صيدليانيه
وازى الحلم دا انا بذات نفسى اغيره لما اعرف مجموعى ف 2 ثانوى
غيرته وخليت حلمى بدل صيدليه يبقى حاسبات ومش اى حاسبات حاسبات عين شمس كمان
رجعت تانى فكرت ف حياتى كمجمل
فى اية اندم علية ؟؟ وفى اية مندمش عليه
طيب لو ندمت اندم لية ؟؟
ولو ما مش ندمت ابقى مش بحس ولا ايه ؟
ولو فكرت ابقى بتعب نفسى
ولو مفكرتش ابقى سلبيه وبضيع نفسى
طب انا عايزه ايه ؟
حلمت كتير وبحاجات اكتر واكتر
ف النهايه
قمت عاشن احاول انام ..برده معرفشى كنت عايزه انام عشان اهرب من الحلم
ولا روحت انام عشان اكمل مسلسل احلامى
المسلسل اللى انا فيه البطله وبرده انا المخرجه فيه
بهيىء كل حاجه ع مزاج البطله
كل حاجه بتبقى متاحه ومتوفره
وكأن الخيال مسخر ليها
بس معرفتش انام
قومت قعدت ع الجهاز وقلت اسجل اللحظه ديه
مش عشان انا مش عايزه انساها
لاء لانها مجرد صفحه من صفحات حياتى اللى بحلم فيها
Leave a Reply
May 17th, 2008 at 8:17 pm
سلامو عليكووووووووو
جيت ارمى السلام فى وقت مزنوقة فية بس حاسة ان مخى فى السحاب اوى :d
وبقولك ان كلامك دا جميل جداااااااااااااااااا حصل معايا امبارح بس مطولتش عشان مكنتش عايزة اسرح
تحسى انها بالمزاج كدا
يلا يااااااااااااااااااااا ثــــــــكر حلوة الدنيا ثكـــــــــــر:d
salamix بالشوكلاتة
مشروبى المفضل
ودى اول مرة ابعت لك فى ليلة مفترجة متتنسيش
يلا سلام:*
this is kiss for yo koky
ciaaaaaaaao
May 17th, 2008 at 9:29 pm
@HABHOBA@
كام حاجه فهمتها وصدمتنى ؟ وقلت يا رتنى ما كنت فهمتها
كام حاجه عرفتها ..بس كانت معرفتها متأخره اوى
فضلت سرحانه وفكرت ف وقت ضيعته ومحستشى بيه بندم ندم عمرى ع الوقت دا ؟
يااااااااه ده بجد حصلى
لما حد بيعرف حقيقة الدنيا دى اوى بيغير فكرته عنها ومعايا انا بالذات بتتغير للأوحش للاسف يعنى
يااااه بجد الموضوع ده عمل ادامى شريط لحياتى فى ثانية
وشفت كل حاجة عدت عليا فى ثانية والله
قلبتى المواجع يابوبو
*******************************************
والاصحاب اللى سبناهم وكل حاجة
*********************************************
من كام يوم عمالة اقولهم انا اللى خلانى احول من حاسبات الزقازيق على الاقل فيها مبنى
سفر سفر بس اكيد كانت هتبقى احسن من البهدلة دى
على ايه يعنى فى بلدى بس متبهدلة وباجى متاخر كل يوم
مالها المدينة والله زى الفل
بس يالا اهى معدتش الا سنتين ونرتاااح خالص من الدنيا
ههههههههههههههههههههههههههه
قصدى من الكلية
والله انا شكلى مهيسة على الاخر الامتحان بكرة وخلاااااااص جبت اخرى فعلا
May 17th, 2008 at 10:00 pm
هبةةةةةةةةة هبهوووووووووووبة حبىىىىىىىىى
افتكر آخر مرة رديت فيه ع البلوج بتاعك كان ردى ما يعمل بيه الا ربنا فى يوم بجد مش عايزة افتكره
دلوقتى بقى النهارده يعنى انا حاسة انى مبسوطة الى حد ما الحمد لله … بغض النظر عن ان فى امتحان بكرة او حاجة
لأ هوا كده .. مع نفسى عااادى جداااا :))
المهم الموضوع ده بجد اول ما قريته كلماته جميلة اوووووى والله وف نفس الوقت صعبةةةةةةةة لما فعلا تفكرى فى كلللل ده ياااااااه ..
والله موضوع جامد ياهبة … بس فكرى فى امتحان بكرةةةةةةةةة ..وربنا معانا كلنا ان شاء الله
سلاااااااااموز :-*
May 18th, 2008 at 12:51 am
[…] برضة زميلة من الكلية دخله تكتب و برضة عندها امتحان معانا بكرة […]
May 18th, 2008 at 11:48 pm
بوسى
وعليكم السلام يا قمر ….
اه انا كنت معاكى وانتى مزاجك ف السحاب
هوه ايه حكايتك بقى ….
طب قاعده زييى قلنا ماشى ..بتسرحى زيى ليه ..انتى بلدياتى ولا ايه؟
اه صحيح تصدقى نسيت انك اول مره تبعتى ..بس الحمد لله ان الجهاز مش هنج المره ديه
سلاموز باللبن والموز والشكولاته بالمكسرات
وكل اللى نفسك فيه يا حبى
:-*:-*:-*
رودى@
منوره والله
ما انا عارفه انه حصلك يا قلبى
بس ابوس كعب رجلللك بلاش يقلب معاكى بحاجات تانيه
قلبتى المواجع يا بوبو
اللى عملت حسابه لقيته … بلاش يا رضوى دا احنا ف ايام مفترجه
كلنا ف التهييس سو يا حبى
يالا سلاموز بالحاجات اللى فوق ديهكلها
:-*:-*:-*
بابى قصدى مونا حبيبتى
مش عايزاكى تفتكرى اخر مره ديه
انسى اليوم دا يا بنتى دا انتى كنتى مدمره ع الاخر
الله يخرب بيته اللى يزعلك بعد كده
ربنا يبسطك دايما ويفرحك يارب ع طوووول
انتى وبقيه العيال كلهك كلهم ..وافرح بيكم واحده واحده
ايه السلاموزات الكتيره ديه
يالا ان شالله ما حد حوش سلاموز بالقشطه بقى كمان اهو
May 18th, 2008 at 11:56 pm
hunikal @
والله احيانا تحس انك فاضى وعايز تخرج من جو المزاكره
فالطبيعى انك بتعمل اى حاجه تخرجك من الجو دا
اياً كان الوقت بقى ….حتى لو قبل الامتحان بساعه
او ليله الامتحان زيى ما انا دخلت وكتبت كده
يالا حصل خير
اه صحيح
شكرنز ع مرور حضرتك
May 19th, 2008 at 12:25 am
كم مرة حلمت واتحقق حلمك …؟؟؟
السؤال حلو أوى بجد ….
بس لو كان كدا .. كان يبقى احسن ؟؟؟؟
كام مرة حلمت وحاولت تحقق حلمك …؟؟؟
بصى ياثتى ….انا شخصيا بحس انى بحلم كتــــيـــــر أوى …
يعنى عندك مثلاا …
انا فضلت 8 سنين بحلم انى ادخل هندزة …. وكاد ان يتحقق الحلم ..وجات لى هنذزة بره المنصورة … ولكن .. مشيئة الله فوق كل شيء… بس تحسى انك عملتى اللى عليكى …ودا المهم …
وحلمت ياستى … انى الاقى صحاب زى الفل كدا زيكم … والحمد لله الحلم يكاد يكون اتحقق … ويارب نفضل مع بعض دايما …
وبحلم ان الناس يبقوا فى حالهم وملهومش دعوة بحد ….
وبحلم انى اشوف اخويا …راجل بجد …وان ربنا يهديه ….
وبحلم انى ابقى ديزاينر …. وادينى بحاول … يمكن يكون فى أمل …
وبحلم بقى … بشخص مجهووووووووووول … ومشطوب الهوية …
وبرضه ربنا يستر …
مش عارفة .. يمكن دول أكتر الاحلام اللى بجد .. بفكر فيها كتير …
بس أكيد فى احلام تانية نونة … كدا … بس برضه مهمة أوى …
وكان فى حتة كدا كنا اخدناها فى اقتصاد ثانوية عامة .
” حاجات واهداف الانسان … فى تجدد مستمر .. فكلما .. سعى الانسان لتحقيقها.. ظهرت له أهداف أخرى .. متزايدة عنها فى الاهمية ……فالانسان يجرى وراء هدف متحرك باستمرار”
حضرتك …
دا على حد اللى انا فاكراه … بس مخرجتش عن المعنى …
انا كنت بحب الجملة دى أوووووووى
ويااااااااااااااااااااااااارب ياهبة كلنا نحقق كلنا امنياتنا
شكرانز ع المووضوع
May 19th, 2008 at 1:00 am
السلام عليكم
اكيد انتى عارفه طبعا ومن غير لكلك كتير ده اول رد ليا
فى بلوجك, بس بوست كويس يا هبه ومعبر جداااااااا
وانا كل اللى اتمنيته لما قرأت موضوعك انى اابقى افتكر اصحابى دول
اللى تهنا عن بعض فى مشاغل الدنيا افتكرهم حتى بينى وبين نفسى المهم
انى اكون فاكراهم ,انا ممكن اكون جافه مع بعض الناس بس
الاكيد والحمد لله ان الجفاف ده مش من فراغ
والحمد لله انى بعطى فرص كتير للناس اللى قدامى
معلشى بقى يا هبهوبه قولت اطول عليكى
علشان اعوض البوستات اللى قبل كده
May 19th, 2008 at 7:29 am
el blog bgd shaklo lazeez w gamed gdn ya habhooob … w really hope it will last 3ala tool
(K)
nice topic ya gameela ,,, bgd hwa 3gabny , bs ana mesh ba3raf atkalem fy el mawadee3 el mohema dy :D:D….
bs bgd nicee awyy
keep it on b2a
May 19th, 2008 at 5:17 pm
السلام عليكم أل حاسبات
ازيك ياهبة عاملة ايه يابه
البلوج بتاعك يجنن باين عليكوا هاتطلعوها فى دماغى واعمل واحد انا كمان
بس ماعلينا …. انا متابعة يابه معلش اول رد ويكون مختصر اوى كدة
انتى عارفة بقى الامتحانات والنظام ده
بس كلمتين بالنسبة للموضوع يعنى
انا بقول فيه اه اوقات نفتكر اللحظات اللى بتمر علينا فى حياتنا والناس اللى قابلناهم
واللى حبيناهم فى حياتنا وزى ماقولتى بتفرقنا الاقدار والظروف والزمن
والطريقة اللى اتفرقنا بيها ….. وفي ناس افترقنا عنهم من غير مانعرف ازاى وازاى بعدنا عن بعض من غير مانحس
بجد دنيا غريبة
احلامى اللى اتحققت واللى ماتحققتش
زى ما البت ميمي قالت كدة عليها نور
انا ياستى ماعنديش احلام علشان احققها ولو عندى مش هاتكون ليها اولوية عندى لو كانت على حساب حد تانى مهما كان
لمجرد انها تسبب الم لحد بتتلاشى من قدامى ممكن لانى مش متمسكة بيها اوى لمجرد انى بعتقد ان احلامى مش تستحق لحظة الم من حد
معرفش ده صح ولالا بس ماعلينا
اه نسيت عندى حلم واحد بس ………. لكن اعتقد انى مش المفروض اقوله
لانه شخصى بطريقة غبية
اللحظات اللى مرت عليها واتصرفت بيها بطريقة معينة ورجعت ندمت عليها
هى الحقيقة حصلت معايا كتير
ومازلت لكن لحظة ماباندم عليها …….. بقول ربنا عاوز كدة وربنا مقدرها
واللى عاوزه هايكون
بجد بتحصل كتير اوى انك تكونى عاوزة حاجة ومتمسكة بيها اوى
لكن يحصل موقف يخليكى تتخلى عنها مش هاقول ببساطة لكن تخليكى عنها تحسى انه هو اللى المفروض يحصل
دى حاجة من الحاجات اللى ممكن تقولى عليها فرص وممكن تندمى عليها
اشوفك على خير فى الامتحان الجاى
May 19th, 2008 at 8:39 pm
ميمى @
جميل برده كام مره حلمت وحاولت انك تحقق حلمك
متهيألى ان كل الناس بتحاول تحقق حلمها …بس كام مره اتحقق بقى ؟
ومعلشى قدرك انك تغشى حاسبات
وجميل اوى انك احلام ليكى اتحققت
ولقيت اصحاب زى العثل كدا زينا ودمم شربات زينا برده
من ضمن احلامى برده والله يا ميمى ان الناس تبقى ف حالها وملهاش دعوه بحد ويريحلو نفسهم
ايوه انا عارفه اخوكى احمد …ما هو زميل اخويا محمد ….بس سؤال هو الجيل دا هيبقى فيهم رجاله ؟؟؟
نفسى والله ..ونفسى ربنا يهيهم كلهم محمد اخويا واحمد اخوكى وكل الولاد اللى ف سنهم واللى اصغر منهم واللى اكبر منهم
ان شاء الله هيبقى فيه امل وسعاد كمان ..بس انتى توكلى ع الله
لما تعرفيه المجهول ابقى سليمى لى عليه اوى وعرفيه ان انا كنت بشكر فيه من قبل ما اشوفه
وربنا يارب يحقق ليكى كل اللى بتتمنيه يارب يا ميمى
حاجات واهداف الانسان … فى تجدد مستمر .. فكلما .. سعى الانسان لتحقيقها.. ظهرت له أهداف أخرى .. متزايدة عنها فى الاهمية ……فالانسان يجرى وراء هدف متحرك باستمرار..
تصدقى بالله اول مره اقرأ الجمله ديه واحسن بمعناه الحقيقى
اصلى كنت بكره الاقتصاد ومكنتش بفهم منه حاجه
***************************
مياده @
اهلين ومرحبا فيكى يا حبى
البلوج منور بيكى اهو …
قلبت المواجع عليكو ولا ايه ؟؟
==
جافه مع بعض الناس بس
الاكيد والحمد لله ان الجفاف ده مش من فرا
==
احيانا بيكون الجفاف ف التعامل له اسباب
بس خاليكى مرنه وسلسه كده
وكبرى يا ستى محدش واخد منها حاجه
***************
NONYAAAA @
يا لذيذ يا رايق انت ..
bs ana mesh ba3raf atkalem fy el mawadee3 el mohema dy :D:D….
ولا يهمك يا جميل
المهم نورتى البلوج يا عثووووله
*****************
May 19th, 2008 at 8:48 pm
Mirage @
ازيك يا جميل
مرحبا فيكون ..ايش عم بتصير اخبارك انتى يا ثكر
كنت لسه بجيب ف سيرتك انا والبت ميمى النهرده …..
حاولى بس تخيلى ادامك حلم صغير وجربى كده تحقيقه وانتى وقدرك ..لو مكتوب ليكى ان الحلم دا يتحقق اكيد ان شاء الله هيتحقق
ان شاء الله ربنا يحقق ليكى الحلم اللى شخصى وبطريقه غبيه ….
وابقى افتركى ساعتها انى دعيت لك
\\\\
بجد بتحصل كتير اوى انك تكونى عاوزة حاجة ومتمسكة بيها اوى
لكن يحصل موقف يخليكى تتخلى عنها مش هاقول ببساطة لكن تخليكى عنها تحسى انه هو اللى المفروض يحصل
دى حاجة من الحاجات اللى ممكن تقولى عليها فرص وممكن تندمى عليها
\\\\\\
معاكى حق والله
يالا ربنا يوفق الجميع ويحقق لنا كلناع بعضنا كل اللى بنلم بيه وبنتمناه ان شاء الله
سلاموووووووووووووووووز